Brúkaraumboðið avdúkaði Prísin 2010.

P/F SMS fekk brúkaraprísin fyri 2010. Hetta hendi á samkomu í nýggju Perluni á Tórsgøtu – mánadagin 21. juni 2010. Sum áður sagt frá, so er at ætlanin á hvørjum ári, at handa ársins brúkaraprís innan ymiskar vinnugreinar, fyri at eggja fyritøkum framhaldandi at virka fyri góðum marknaðarføringarsiði, til frama fyri føroyska brúkaran.

Grundgevingar fyri at P/F SMS fekk ársins brúkaraprís 2010 eru fylgjandi:

• Fyritøkan hevur gingið undan at tillaga sítt virksemið bæði áðrenn og eftir at marknaðarføringarlógin kom í gildi. Fyritøkan hevur fyri 5-6 árum síðani skipað fyri felags umbýtingarrætti fyri allar handlar í SMS.

• Fyrsta fyritøkan, sum byrjaði miðvíst, at nýta føroyskt lýsingarmál.

• Fyritøkan hevur umleið 45.000 til 50.000 gestir um vikuna, harav 80 % keypa í onkrum av handlunum. Brúkaraumboðið hevur sera fá mál í mun til ta mongd av viðskifta avgreiðslum, sum hava samband við fyritøkuna.

• Fyritøkan hevur sýnt góðan samstarvsvilja til at rætta mál, sum kærd eru um.

• Í samskiftinum hevur fyritøkan fleiri ferðir biðið um ráðgeving og forhandarmeting til ætlað tiltøk.

Endamálið við brúkaraprísinum er at varpa ljós á týdningin av brúkaravernd, prísgjøgnumskygni og sum heild góðum marknaðarføringarsiði.